Nú vorar í Mosfellsdal og af því tilefni verður blásið til fjölbreyttrar vordagskrár á Gljúfrasteini. Viðburðir verða haldnir á safninu alla laugardaga frá 20. apríl til 25. maí. Benedikt Hjartarson, prófessor í bókmennta- og menningarfræði ríður á vaðið næstkomandi laugardag. Hann ætlar að segja frá rannsókn sinni á Rauðum pennum og þeirri ofgnótt þýðinga á heimsbókmenntum sem komu út á Íslandi í tengslum við hreyfinguna.
Hver viðburður verður auglýstur sérstaklega þegar nær dregur, en þeir munu standa í um það bil klukkustund. Hér má sjá vordagskrána í heild:
20. apríl, kl. 14 Snerting af skapandi anda og nýjum lífsskoðunum. Benedikt Hjartarson fjallar um Rauðar heimsbókmenntir á Íslandi 1919-1943.
27. apríl, kl. 14 ,,Nú vil ég bara láta bjóða mér”: Þóra Vigfúsdóttir og ósýnileg vinna kvenna í tengslum við móttöku erlendra gesta í kalda stríðinu. Rósa Magnúsdóttir, prófessor í sagnfræði við Háskóla Íslands.
4. maí, kl. 14 Ásur þrjár og Ingur tvær: Vinahópur Erlendar í Unuhúsi. Jón Karl Helgason og Sunneva Kristín Sigurðardóttir.
11. maí, kl. 14 Listaverkaleiðsögn. Ólafur Ingi Jónsson forvörður á Listasafni Íslands.
18. maí, kl. 14 En þeim á ég flest að þakka. Sunneva Kristín Sigurðardóttir og Guðný Dóra Gestsdóttir bjóða upp á leiðsögn um húsið með áherslu á gestgjafana tvo: Erlend í Unuhúsi og Auði Laxness.
25. maí, kl. 14 Myndarheimili. Birta Fróðadóttir er starfandi arkitekt og lektor við arkitektúrdeild LHÍ og mun í leiðsögninni beina sjónum að tilurð hússins, hönnun þess og því sérstæða safni hönnunarhúsgagna og listaverka sem menningarheimilið Gljúfrasteinn býr yfir.
31. maí, kl. 20 Plöturnar í Unuhúsi. Hlustunarpartí þar sem spilaðar verða plötur úr plötusafni Erlendar í Unuhúsi. Viðburðurinn fer fram í Mengi, Óðinsgötu 2.
Frítt er á alla viðburðina. Verið velkomin á Gljúfrastein.