Gljúfrasteinn og önnur söfn á landinu eru lokuð vegna samkomubanns. Starfsfólk situr þó ekki auðum höndum og hefur síðustu daga bætt ýmsu við á vefsíður til að gleðja og stytta fólki stundir. Það á líka við um samfélagsmiðla og hægt að finna ýmsilegt undir myllumerkinu #safniðísófann
Á vef Gljúfrasteins er að finna mikinn fróðleik um ævi og verk Halldórs Laxness og um fjölskylduna sem bjó á Gljúfrasteini. Einnig er þar hægt að skoða hannyrðir Auðar Laxness og prjónauppskriftir hennar, hér er til dæmis uppskrift Auðar að garðaprjónapeysu með ílepparósum
Á vefnum innansveitarkronika.is er hægt að hlusta á upplestur Halldórs Laxness á Innansveitarkroniku en í ár eru liðin 50 ár frá því að bókin kom út. Þar er einnig hægt að finna rafbókina. Á vefnum er líka fróðleikur um sögusviðið og persónur sögunnar. Vefurinn um Innansveitarkroniku er samstarf Gljúfrasteins, Landsbókasafns Íslands – Háskólabókasafns, Forlagsins, Verkfræði- og náttúruvísindasviðs Háskóla Íslands og fjölskyldu Halldórs Laxness.
Innansveitarkronika kom út í september árið 1970 og sagði þá í bókakynningu að sagan væri rituð ,,af snillingi skáldsögunnar að skemmta sjálfum sér”.