Verk Halldórs Laxness hafa komið út í meira en 500 útgáfum á yfir fjörutíu tungumálum. Gunnar Gunnarsson þýddi Sölku Völku á dönsku 1934 og þá tóku hjólin að snúast. Í kjölfarið fylgdi útgáfa á Sölku Völku í Englandi og Bandaríkjunum árið 1936 og næstu bækur áttu eftir að bera hróður hans enn víðar. Hátindurinn var útgáfa Random House á Sjálfstæðu fólki árið 1946 sem m.a. var bók mánaðarins í stærsta bókaklúbbi Bandaríkjanna. Hálf milljón eintaka seldist á aðeins tveimur vikum.

Eftir að Halldór hlaut Nóbelsverðlaunin í bókmenntum 1955 varð útbreiðsla verka hans enn meiri. Hinn enskumælandi markaður vestan hafs reyndist þó erfiður þar sem stjórnmálaskoðanir Halldórs áttu ekki upp á pallborðið í kalda stríðinu.

Um og upp úr níunda áratugnum tóku verk Halldórs aftur að rata á markað í nýjum útgáfum hjá öflugum forlögum með reglubundnum hætti. Meðal annars voru þau gefin út í Þýskalandi í nýjum eða endurskoðuðum þýðingum. Um miðjan tíunda áratuginn opnuðust Bandaríkin að nýju fyrir verkum Halldórs Laxness en þá kom Sjálfstætt fólk út hjá Random House. Þarlend stórblöð fögnuðu endurfundunum og kepptust við að lofa ritverkið og persónusköpunina í verkinu.

Í kjölfarið fylgdi útgáfa á öðrum skáldsögum Halldórs Laxness, bæði í Bretlandi, Bandaríkjunum og víðar. Sjálfstætt fólk komst aftur á markað í Hollandi eftir meira en hálfrar aldar hlé og samið var um fyrstu útgáfu verksins í upphafi nýrrar aldar, meðal annars í Frakklandi og Tyrklandi svo eitthvað sé nefnt.