Fæðingardagur Halldórs Laxness er í dag
Halldór við skriftir í vinnustofu sinni á Gljúfrasteini
Halldór Laxness fæddist þann 23. apríl 1902 á Laugavegi 32 í Reykjavík en fluttist þriggja ára gamall að Laxnesi í Mosfellsdal.
Í dag eru liðin 107 ár frá fæðingu skáldsins. Eftir hann liggur fjöldi ritverka sem mörg hver skipa sérstakan sess í bókmenntasögu þjóðarinnar. Gljúfrasteinn hefur verið opin sem safn Halldórs Laxness frá 4. september 2004.
Í ár ber afmælisdagur skáldsins upp á sumardaginn fyrsta.
Erfingjar skáldsins undirrita nýjan samning við Vöku-Helgafell um útgáfu verka hans á komandi árum. Til að fagna undirrituninni kemur Sjöstafakverið út í kilju þennan sama dag. Bókin verður seld á aðeins 499 krónur.
Jafnframt verður öllum landsmönnum gert kleift að hala niður án endurgjalds lestri Halldórs á Atómstöðinni á vef Forlagsins á tímabilinu 23. apríl til 1. maí.
Alþjóðlegur dagur bókarinnar er einnig í dag sem jafnframt er dánardægur William Shakespeares og Miguel de Cervantes.
Athugið að safnið verður lokað milli klukkan 13-15 í dag.
