Leiðsögn um veröld Auðar Laxness á Gljúfrasteini

Nú eru tæplega tvö ár frá því að byrjað var að bjóða uppá leiðsögn á Gljúfrasteini sem tileinkuð er Auði Sveinsdóttur Laxness. Tilefnið var að sumarið 2018 voru 100 ár liðin frá fæðingu Auðar. Leiðsögnin ber yfirskriftina Frjáls í mínu lífi  og í henni eru sagðar sögur af húsfreyjunni og listakonunni Auði Laxness og staldrað við margar af glæsilegum hannyrðum hennar, þar á meðal púðann Landaparís sem hún saumaði út undir áhrifum frá verkum listamannsins Pablo Picasso og Maríuteppið sem hún gaf Halldóri Laxness, eiginmanni sínum eftir að hann fékk Nóbelsverðlaunin.