Ylja á stofutónleikum Gljúfrasteins

Þær Bjartey Sveinsdóttir og Gígja Skjaldardóttir sem skipa dúettinn Ylja syngja og leika á gítara nýstárlega þjóðlagatónlist sína á stofutónleikum Gljúfrasteins, sunnudaginn 15. júlí kl. 16.

Ylja hefur vakið verðskuldaða athygli fyrir nýstárlega þjóðlagatónlist sína þar sem draumkenndur gítarleikur hljómar fallega við hljómfagrar raddir Bjarteyjar og Gígju.

Í ár eiga þær 10 ára afmæli og ætla að halda upp á það með tónleikum á Gljúfrasteini, en þar munu þær leika sín helstu lög auk þess að kynna efni af nýrri plötu sem mun líta dagsins ljós í haust.

Stofutónleikarnir eru haldnir hvern sunnudag til 26. ágúst og hefjast þeir kl. 16:00. Miðar eru seldir í safnbúð Gljúfrasteins samdægurs og kosta 2500 kr. Ókeypis er fyrir börn á leikskólaaldri.

Dagskrá stofutónleikanna í heild sinni. 

Til baka í viðburði