Á næstu stofutónleikum Gljúfrasteins, á þjóðhátíðardaginn sjálfan þann 17. júní leiða saman hesta sína tveir af fremstu jazzleikurum þjóðarinnar.
Eyþór Gunnarsson píanóleikari hefur verið leiðandi afl hinnar síungu hljómsveitar Mezzoforte í rúm 30 ár, eða rúmlega lífaldur Ara Braga Kárasonar trompetleikara sem nýlega er snúinn aftur heim eftir langa útivist, m.a. í hringiðu jazzins í New York.
Saman sanna þeir að kynslóðabil er ekki til í jazzmúsik frekar en annarri list. Dagskrá þeirra byggist á sterkri meðvitund um hefðir í tónlist og hugrekki til að láta laglínuna og spunann leiðast í harmóníu út í óvissuna.
Stofutónleikarnir eru haldnir hvern sunnudag til 26. ágúst og hefjast þeir kl. 16:00. Miðar eru seldir í safnbúð Gljúfrasteins samdægurs og kosta 2500 kr. Ókeypis er fyrir börn á leikskólaaldri.
Dagskrá stofutónleikanna í heild sinni.
Til baka í viðburði