2. september: Gönguferð með Ferðafélagi barnanna

Sumri hallar og berin bíða bústin á lyngi rétt utan við borgarmörkin. Ferðafélag barnanna býður upp á skemmtilega laugardagsgönguferð sem nærir bæði líkama og sál og liggur um rómað berjaland og slóðir Halldórs Laxness. 

Gangan hefst fyrir utan Gljúfrastein kl. 11. Gengið verður áleiðis að Helgufossi, meðfram Köldukvísl. Þarna fór Halldór Laxness í sína daglegu hressingargöngu meðan hann bjó á Gljúfrasteini. Gönguferðirnar voru honum uppspretta hugmynda. Hvað skyldi göngugörpunum detta í hug á leiðinni?

Göngufólk er hvatt til að taka með sér nesti og auðvitað ílát undir berin.

Áður en haldið er af stað er göngugörpunum boðið inn á safnið á Gljúfrasteini. Þetta er upplagt tækifæri til að kynna skáldið og húsið fyrir yngstu kynslóðinni. Gönguferð og heimsókn í safnið tekur um það bil þrjár klukkustundir.

Þátttakendur eru hvattir til að nota bílastæðið framan við Jónstótt við gömlu brúna yfir Köldukvísl. Þá er keyrt upp afleggjarann áður en komið er að Gljúfrasteini, við græna strætóskýlið í Mosfellsdal á móti hestaleigunni í Laxnesi. Sjá hér á korti.

Ferðin er farin í samstarfi við Vinafélag Gljúfrasteins.

Þátttaka ókeypis og allir velkomnir. Ekkert að panta, bara mæta!

Áin Kaldakvísl og í fjarlægð sést glitta í bakhlið Gljúfrasteins.