Sýningin Að öðru leyti eftir ósk skáldsins öðlast framhaldslíf

Alexandra Chernyshova sópran og Elina Valieva píanóleikari flytja tónlist á opnun sýningarinnar Að öðru leyti eftir ósk skáldsins.

Í september stóð Gljúfrasteinn fyrir sýningunni Að öðru leyti eftir ósk skáldsins í Listasal Mosfellsbæjar en henni lauk þann 30. september síðastliðinn. Sýningin var vel sótt og var almenn ánægja með hana á meðal gesta. 

Á sýningunni gaf að líta fjölbreytt úrval gripa úr safneign Gljúfrasteins,  m.a. merkilega muni úr nótna- og plötusafni Halldórs og Auðar og ljósmyndir frá tónleikum sem haldnir voru á Gljúfrasteini á 6. áratugnum. 

Ljósmyndirnar á sýningunni voru teknar þegar Halldór var formaður MÍR sem á þessum árum tók á móti sendinefndum frá Sovétríkjunum. Í sendinefndunum voru tónlistarmennirnir Aram Katsjatúrian, Tatjana Nikolaéva, Pavel Lisistjan, Mstislav Rostropovitsj ásamt fleirum.

Ljósmyndahluti sýningarinnar mun fá framhaldslíf í húsakynnum MÍR á Hverfisgötu í nóvember. En opnun þeirrar sýningar verður nánar auglýst síðar.

Gljúfrasteinn þakkar MÍR, rússneska sendiráðinu á Íslandi, Vinafélagi Gljúfrasteins, Mosfellsbæ og Safnaráði fyrir gott samstarf og stuðning.

Hér fyrir neðan má sjá myndir af sýningunni.