Sarpur

Í vinnuherbergi Halldórs eru allar innréttingar upprunalegar, teiknaðar af Birtu Fróðadóttur, dönskum hönnuði sem var eiginkona Jóhanns Jónssonar, garðyrkjumanns í Mosfellsdal. Yfir púltinu eru myndir af fjölskyldumeðlimum og vinum og málverk Nínu Tryggvadóttur af Erlendi í Unuhúsi. Yfir skrifborðinu, sem Auður Laxness vann við og vélritaði á, er málverk eftir Svavar Guðnason. Í skjalaskápnum voru bréf Halldórs en Auður hefur afhent þau Landsbókasafni. Yfir skápnum er mynd eftir Jóhannes Kjarval.

Í gagnagrunninum Sarpi er meðal annars að finna upplýsingar um listaverk, muni, myndir og annað efni sem varðveitt eru á íslenskum minjasöfnum. Sarpur er menningarsögulegt gagnasafn, fullt af fróðleik.

Gljúfrasteinn er aðili að Sarpi. Hægt er að leita einungis að gripum sem til eru á Gjúfrasteini og er þá farið í valmyndina ,,öll söfn“ og í flettistikunni er valið ,,Gljúfrasteinn – hús skáldsins“. Hér á safninu hafa allir gripir í húsinu verið skráðir og er til dæmis búið að setja inn myndir af öllum gripum sem eru að finna í vinnuherbergi Halldórs Laxness. Vinna við ljósmyndun á gripum stendur yfir og verða þær færðar yfir í Sarp jafnóðum.

Hér má til að mynda sjá mynd og upplýsingar af púlti skáldsins.