Mikilvægur styrkur úr safnasjóði

Við arininn í stofunni stendur „Eggið" eftir Arne Jacobsen en þar sat Halldór gjarnan. Myndin til vinstri, ofan við stólinn, er eftir Kristján Davíðsson. Í hinum stólnum er púði sem Auður gerði í París og kallaði Landaparís; með litunum ætlaði hún að fanga andrúm borgarinnar. Á arinhillunni rísa hæst tvö Afríkulíkneski sem Halldór og Auður keyptu af Kristjáni Davíðssyni en hann flutti þau heim með sér þegar hann kom úr námi í Bandaríkjunum. Þá er frönsk stytta, mynd af Ása-Þór, stytta sem Auður keypti á Indlandi og önnur grænlensk. Yst til hægri er mynd eftir Ásmund Sveinsson sem Auður keypti um 1940.

Safnið á Gljúfrasteini hefur verið starfrækt frá árinu 2004 og því hafa listaverk og aðrir munir verið til sýnis í húsinu í nær 16 ár.  Gestir Gljúfrasteins geta virt fyrir sér flest listaverkin sem prýddu heimili Halldórs og Auðar og þannig séð betur inn í þá veröld skáldsins sem heimili hans var.  Þetta skapar þó þann vanda að mikið álag getur verið á gripum, einkum vegna sólarljóss. Á árinu 2019 var útbúin forvörsluáætlun fyrir listaverk safnsins með góðum styrk úr safnasjóði. Með styrkveitingunni í ár gefst tækifæri til að útbúa forvörsluáætlun fyrir húsgögn og aðra muni í eigu safnsins. Þórdís Anna Baldursdóttir forvörður er samstarfsaðili að verkefninu og stýrir því.