Blessuð sólin hækkar á lofti þessa dagana með tilheyrandi birtu sem við fögnum flest. En geislar sólarinnar geta verið skaðlegir fyrir viðkvæm listaverk, ýmsa muni og húsgögn á Gljúfrasteini og það þarf að vernda.
Í dag kom Þórdís Anna Baldursdóttir, forvörður á Gljúfrastein en hún sérhæfir sig í varðveislu textíls og pappírs sem eru sérstaklega viðkvæm fyrir birtunni. Þórdís hefur útbúið nokkrar yfirbreiðslur sem eiga að vernda listaverk og húsgögn í stofunni og víðar í húsinu þeirra á meðal Maríuteppið sem Auður Laxness teiknaði og saumaði þegar Halldór Laxness fékk Nóbelsverðlaunin.